ఓ కథానాయిక కొత్త సినిమాలకు డేట్స్ ఇవ్వలేనంత బిజీ బిజీగా ఉంటే.. అది మరో నాయికకు ప్లస్ అవుతుంది. ప్రస్తుతం శ్రీయకు అలానే జరిగింది. మలయాళంలో పృథ్వీరాజ్ హీరోగా ‘హీరో’ అనే చిత్రం రూపొందనుంది. ఈ చిత్రంలో త్రిషను నాయికగా అనుకున్నారు. కానీ త్రిష డేట్స్ కేటాయించలేని పరిస్థితిలో ఉండటంతో ఈ అవకాశం శ్రీయకు దక్కింది. త్రిష, శ్రీయ ఇద్దరూ మంచి స్నేహితులు. అందుకని తను వదులుకున్న సినిమా శ్రీయకు దక్కడంపట్ల త్రిష ఆనందపడుతున్నారట.
అలాగే త్రిష కాదనుకున్న సినిమాలో తను నటించడం శ్రీయకు కూడా ఆనందాన్నిచ్చిందట. దీపన్ దర్శకత్వంలో ఈ చిత్రం రూపొందనుంది. ఇటీవల ఈ చిత్రకథను ఆయన శ్రీయకు వివరించారట. కథ విని ఈ బ్యూటీ ఎక్సైట్ అయ్యి, వెంటనే డేట్స్ ఇచ్చేశారట. మలయాళంలో శ్రీయకి ఇది మూడో సినిమా. ‘పోకిరి రాజా’ చిత్రం ద్వారా కేరళీయులకు పరిచయం అయ్యారామె.
ఆ చిత్రం శ్రీయకు మంచి గుర్తింపు తెచ్చిపెట్టింది. మలయాళంలో ఆమె నటించిన రెండో సినిమా ‘కాసనోవా’ త్వరలో విడుదల కానుంది. ఇక తాజాగా కమిట్ అయిన ఈ మూడవ సినిమా షూటింగ్ త్వరలో ఆరంభం కానుంది. ప్రస్తుతం శ్రీయ తెలుగులో ఓ సినిమా, హిందీలో ‘గల్లీ గల్లీ మే చోర్ హై’ చిత్రంలో నటిస్తున్నారు. విక్రమ్ హీరోగా రూపొందుతున్న తమిళ చిత్రం ‘రాజబాట్టయ్’లో ఆయన సరసన శ్రీయ ఓ ప్రత్యేక పాటకు కాలు కదిపారు.